الجزء الثانى من قصة سواد الليل

بسم الله الرحمن الرحيم


اللهم صل على محمد وعلى آله وصحبه أجمعين


السلام عليكم ورحمة الله وبركاته



اليوم ومثل ما وعدتكم بإضافة الجزء الثاني من قصة..(بداية إجازة سودة لمنامي والفارس)



إليكم الجزء الثاني من القصة..



يوم رد الاعتبار العالمي.. منامي والفارس قاعدين عالبحر بعد أسبوع من الحادثة اللي صارت لهم بالحديقة..
الفارس: تذكر أول يوم في الإجازة؟؟
منامي يضحك: اسكت اسكت بس لا تذكرني.. وأنا أقدر أنسى هاليوم.؟ يوم أسود..
الفارس: صدق أنا ما صادني نفس اللي صادك بس فيي غل عليها.
منامي: وأنا بعد.. بس يالله.. نخليها على الله.. ما كانت تقصد..
الفارس: أنا وياك.. ما تقصد بس لازم تحاسب له.. رامية القشور إلى ويش؟؟ هذا تصرف؟؟.. لكن لازم أرد اعتبارك واعتباري..
منامي: لا ترد اعتباري.. ولا أرد اعتبارك.. وخلنا هني أحسن..
الفارس: خلاص الفكرة في راسي..
منامي: ويش بتسوي؟؟
الفارس: بتساعدني؟؟
منامي: على ويش؟؟
الفارس: أول جاوب.. بتصير ويايي بقول لك.. ما بتصير خلك وما بقول لك..
منامي: أمرنا لله.. سير وأنا وياك..
الفارس: بانتقم منها..
منامي: أدري بس شلون؟؟
الفارس: قوم قوم.. بسرعة..
منامي: وين؟؟
الفارس: لتنفيذ الخطة.. هه.. الفارس آتٍ.. سينسف أعداءه حتماً..

قاموا من عند البحر وركبوا السيارة..
منامي: أنت أبوك يدري انك أخذت السيارة؟؟
الفارس: لا..
منامي: بيكفخك.. إذا درى..
الفارس: لا حبيبي.. أبويي ما يكفخني.. أصلاً هوه اللي يعطيني السيارة..
منامي: والله أبوك هذا ذهب.. يعطيك السيارة وما عندك ليسن..
الفارس: أبويي بس ذهب؟؟ أبويي ألماس..
منامي والفارس: هههههههاااي..

وقف الفارس السيارة صوب برادة ونزل.. راح اشتري موز بـ 5 ربيات ورجع..
منامي باستغراب: هذا ليش؟؟
الفارس: حق تاكله يا حبيبي..
منامي مستغرب: أنت من متى كريم؟؟
الفارس: من زمان..
منامي: حتى إذا بغى يصير كريم ما يعرف.. الناس تعزم على موز؟؟
الفارس: كل كل بس وأنت ساكت.. وأنا بعد باكل ولا تقعد تتشحط.. وبعدين بتشوف ويش بيصير..

بعد ما قضوا على الموز..
منامي: أنعـــل.. بطني انتفخ.. مانا قادر..
الفارس: ما على.. حتى لو لزمت عليك تاكل واجد... استحمل.. بعدين بتفرح..
منامي: ظلت موزة وحدة..
الفارس: كلها..
منامي: مجنون أنت؟؟ ما أقدر..
الفارس: ولا أنا أقدر.. لكن تدري؟؟ جيبها..

راح عطاها جاهل في الشارع ياكلها وأخذ القشر ورجع..
منامي: لا يكون ناوي.....
الفارس: أي..
منامي: بـــــل .. حرام..
الفارس: حرمت عليك عيشتك.. وأنت مو حرام يوم تطيح؟؟
منامي: بس بعد..
الفارس بعصبية: أسكت..

لما وصل الفارس صوب بيت نسيم.. نزل ومعاه كيس القشور..

منامي: معزم؟؟
الفارس: وملزم..

نشر قشور الموز على باب بيتهم..

منامي: لو يطلع واحد غيرها هيه..؟
الفارس: لا تقعد تفاول علينا..
منامي: لا تغربلنا.. شيله..
الفارس: أسكت..

ركب السيارة ووقفها على صوب يطالع النتيجة..

بعد مدة انفتح الباب.. وصاروا يترقبون.. منو اللي بيطلع؟؟!

بـــــــــل.. منو؟؟

عاشقة الزهراء..!!
منامي بصدمة وعصبية: صقعة تصقعك يا الغبي..
الفارس: بــــل
منامي: هالفقيرة وش ذنبها؟؟
الفارس: بـــــل... اسكت..
منامي: إن شاء الله تشوفه قبل لا تدوس عليه..
الفارس: بــل.. طاحت..


نسيم: يا علي.. بسم الله عليش وعلى عمرش.. تعورتين؟؟
عاشقة الزهراء: آآآي.. آآآخ.. قوميني لا يجي أحد..
نسيم: قومي قومي خلف چبدي.. بسم الله عليش.. يا علييييي.. هذا منهو اللي حاط العداوة لينا؟؟ بــــل قشور واجد..
عاشقة الزهراء واهي تقوم: واني اللي طحت فيها.. آآآي..
نسيم: سلامتش حبيبتي.. ما تشوفين شر..
عاشقة الزهراء: الله يسلمش.. يللا يللا.. بمشي أني.. كفاية تكسيرتي اللي ذقتها من ورا جية بيتكم..
نسيم: يا علي.. سامحيني مو بيدي.. لو أدري إن في قشور موز ما خليتش تطلعين..
عاشقة الزهراء: بسش.. اكو جا ابويي يالله باي..مع السلامة.
نسيم: الله يسلمش..


وقفت نسيم تفكر شوي بره..: منو هذا؟؟ وبعد لحظات دخلت بيتهم..

منامي: زين چدي؟؟
الفارس: وأنا وش دراني؟؟
منامي: الشره عليي اللي سامع كلامك..
الفارس: انزين عاد انت.. لا تقعد تعور راسي..
منامي: هذا أنت.. تسوي الجرايم ولا تتوب..
الفارس: أنا أفكرالحين.. هذي ساحرة يعني؟؟
منامي: ساحرة؟؟ هذا من الغباء.. مو شرط هيه اللي بتطلع..المفروض أنت اللي تفهمها يا غبي..
الفارس: صدق أنا غبي..كان لازم اضرب الجرس.. ويمكن هيه اللي بتطلع..
منامي: بسك بسك.. ودني بيتنا..
الفارس: بعدي ما رديت اعتباري انتظر..
منامي وهوه فاتح عيونه: الله أكبر.. بعد ناوي على جريمة ثانية؟؟
الفارس: لا تقعد تسوي روحك مثالي.. واسكت.. وغصباً عنك بتشترك ويايي في العملية.. وإلا نسيت انك قلت بتشترك ويايي..؟؟
منامي: لا ما نسيت بس هونت..
الفارس: مو على كيفك.. لو أنت بياع حجي نفس النسوان؟؟
منامي: لا.. وأنا رجال.. وبصير وياك في العملية...
الفارس: أي جذي تعجبني.. سبع..

الفارس عارف إلى منامي عدل.. وعارف نقاط ضعفه.. عشان چذي عارف يكسبه في صفه.. ويخليه يساعده ويشترك معاه في الجريمة..

طلعت نسيم تنظف بره من قشور الموز..

الفارس: عاد الحين ما في أحد بينقذها..يللا هجووووووم..

وطلقوا المدافع.. والقنابل المائية انطلقت على نسيم.. هذا شنو؟؟ بالونات مائية؟؟!
بس نسيم ما تعرف مصدرها من وين.. اهي تشوف الجهة اللي تجي منها البالونات.. بس ما تشوف منو اللي يرميها..


الفارس: الله أكبر.. هذي ساحرة أكيد..
منامي: ويش صار؟؟
الفارس: هالمرة أخوها..
منامي بصدمة: هااااا... أخوها؟؟ كبير؟؟
الفارس: شــــيــــل عــــلـــــيــــه..

وهربوا وأخوها وراهم.. يبي ينتقم.. طالع ولابس ومتكشخ وراه مشوار.. ويخربون كشخته بالماي؟؟

بس لحسن حظهم إن أخوها بطيء وهم سريعين وقدروا يهربون بدون ما يحدد هويتهم..


منامي واهو يتنفس بقوة: هذي.. آخر.. مرة..
الفارس بنفس الحالة: أقول لك.. هذي ساحرة..
منامي: والله عاد.. يوم تدري.. انها ساحرة .. وش لك بها؟؟
الفارس: بعدنا ما كملنا شغل..

وراح البرادة واشترى ماي.. وطلع ورمى عليه غرشة ماي: هاك.. خذ برد على قلبك.. وقريب يبرد خاطرك.. وانتقم لك منها..
منامي باستغراب: للحين تبي تنتقم؟؟
الفارس: لما أرد اعتباري.. بعدين ارتاح..
منامي: الله كريم..
الفارس: أي والله.. الله كريم.. ويريحني.. ويرد اعتباري منها..
منامي: الله يهديك..
الفارس: يللا سير.. بروح آخذ السيارة وبفكر بخطة..


راحوا صوب بيتهم وركبوا السيارة..


الفارس: الرمل انتقام بسيط وضعيف.. لازم انتقم انتقام عدل..
منامي: ويش بعد؟؟
الفارس: الانتقام اللي في بالي.. بيخسر شوي من ميزانيتي.. بس ما علينا..
منامي: وش بتسوي..
الفارس: وقت البيبسي..
منامي: يعني كل شي سوته بترده لها؟؟
الفارس: هذا آخر أمل..
منامي: يللا راونا وش بتسوي.. والله ولا بتستفيد..
الفارس: قوم بسرعة اشتر بيبسي من البرادة وتعال..بس عاد من الكبار ها.. وآنا براقب الوضع..
منامي: أمرنا لله


راح اشترى ورجع.. وللحين الفارس يراقب..

منامي: والحين؟؟
الفارس: ننتظر لما تطلع وبيجيها هالبيبسي فوقها.. وبيعفسها عفاس.. نفس ما عفستك..
منامي: وبيطلع هالمرة أبوها وبيصيده واحنا نروح فيها..
الفارس: لااا.. هالمرة الخطة محكمة..

بعد ساعة تقريبا طلعت نسيم بتروح بيت جدها..
منامي: اكي طلعت طلعت..
الفارس: انتظر..رج البيبسي أنت الحين.. ويصير خير بس تتباعد ننتقم..

تباعدت نسيم..ولحقوها بالسيارة.. ورجوا البيبسي ولما طافوا فتحوا الغرشة.. والمسكينة هالمرة انعفست عفاااس..

الفارس قام يصارخ من الوناسة وذبح عمره.. ومنامي على قد ماهو متونس ندمان.. وعلى طول هربوا بعيد بالسيارة..

نسيم: ترى هذول الحقودين اللي ناصبين ليي هالعمايل.. قلوبهم سودة..
رجعت بيتهم وراح تسبح..

الله ما يظلم أحد.. نسيم ما كانت تقصد.. بس الفارس ومنامي جايين ينتقمون.. منامي مسكين.. لكن الفارس مجرم..
وهم يمشون في الشارع داس الفارس على مسمار بالسيارة وصادها بنجر..

الفارس بخوف: بـــــل.. راحت عليي..
منامي: صدق إن الله يمهل ولا يهمل.. حوبة الفقيرة.. إلا الفقرا اللي سويت جرايم فيهم
الفارس: أسكت.. أنا في ويش وهوه في ويش..
منامي: ويش بعد.؟ روح ودها بيتكم وقول لأبوك.. وبتحصل لك خبزة لو خبزتين من العدل وبيحمر لك ظهرك.. هههههههههاااي
الفارس: خد عنه اللي ما يستحي.. يتشمت..
منامي: ويش أسوي بعد..؟ روح روح..واستحمل الضرب اللي بتحصله.. يحسب.... أبوك ذهب لكن أنت حمار..
الفارس: بدال ما تواسيني قاعد تشمت فيي..
منامي: ويش أسوي ليك؟؟ هذي آخرة اللي يتعاونون على الإثم والعدوان..
الفارس: أي والله.. لكن كله منك..
منامي بصدمة: مني؟؟!
الفارس: لو ما صادك اللي صادك من أسبوع ما سويت أنا هالبلاوي..
منامي: أي بتفلتها عليي خوب الحين..
الفارس: ما توصل السيارة البيت أصلاً.. تدري؟؟ بسوي البنجر أنا..
منامي: وأنت تعرف؟؟
الفارس: من يوم أنا صغير.. كل أچحت ويه أبويي وعمومي.. يعني أقدر.. متعلم.. أعجبك..
منامي: بنشوف..
الفارس: لكن كل منها هالسوسة.. نبلتها.. حتى يوم برد خاطري.. التاير بنجر.. سبحان الله..

طلع الفارس ميكانيكي زين.. صلح البنجر.. ووصل منامي بيتهم.. وراح على بيتهم.. قال لأبوه إن السيارة صادها بنجر.. بس صلحه.. وعلى ما قال أبوه ذهب.. ما سوى فيه شي.. بس هدده انه لو أخذ السيارة مرة ثانية بيكون له تصرف ثاني وياه..


منامي ندم.. وندم كبير على اللي سواه.. وتعلم درس انه مرة ثانية ما يطيع أحد ويمشي معاه في الطريق الشين..

الفارس صحيح ندم.. بس مو مثل منامي.. لأن عقله عقل مجرمين.. وبو طبيع ما يجوز عن طبعه.. ما بينتقم من نسيم.. بس لو يصير له هالموقف مرة ثانية.. ما ندري يمكن ينتقم..

نسيم بعد تعلمت درس.. إنها ما ترمي قشور الموز أو الوسخ على الأرض.. لأن الناس بيتضررون.. وحست بألم صاحبتها عاشقة الزهراء لما طلعت وطاحت.. وقالت مسكينة وش ذنبها تطيح؟؟ ووش ذنب منامي مسكين يوم يطيح من القشرة اللي رميتها.. هو صحيح أذاني ويه الفارس.. بس بعد حرام يطيح وهوه ما سوى شي.. وبعد تعلمت انها تكون أكثر حذر في المرة الجاية..


هذي عبرة واستفاد منها اللي صار له الموقف.. انزين وانتوا اللي ما صادكم الموقف شنو استفدتون؟؟


وإن شاء الله في القصص الجاية تكون شخصيات أكثر.. وتكونون من أبطالها..




إن شاء الله تكون عجبتكم واستفدتون منها..
وهذي نهاية القصة ^_^



دمتم في حفظ الله وصونه